குறுங்(ஞ்செய்தி) கவிதை

உன் குறுஞ்செய்திக்கு
தாமதித்தே பதில்
அனுப்புகிறேன்
ஏனென்றால்
என் பதிலுக்காக
நீ காத்திருக்கும்
உன் ஒவ்வொரு
நொடியும் முற்றிலும்
எனக்கானது

முட்டாள் நிலா

தன் அழகை
வியந்தது நிலா,
தான் பார்த்தது
கண்ணாடி அல்ல
அவள் முகம்
என்று அறியாமல்

பிரபஞ்ச அதிசியம்

நிலவுக்குள் நட்சத்திரங்கள்
பற்கள் தெரிய சிரித்தாள்
அவள்

குடிகாரர்கள் கவனத்திற்கு

மதுவை போதை என்பவர்களே
அவள் கண்களை
கண்டதில்லையா?

சர்க்கரை பெண்

சுவரெல்லாம்
எரும்புகள்
அவள் தொட்டிருபபாளோ?

காதல் விதி

நீ உடல்
நான் உயிர்
உனக்குத்தான் புணர்ச்சிவிதி தெரியுமே
ஏன் கோபப்படுகிறாய்?

இருள் விரட்டி

சிவப்பால் தான் இருளகற்ற
முடியும்;சந்தேகமா?
காலையில் பாருங்கள்....

உலகமும் உறவுகளும்

அமெரிக்கா அத்தையை
இ.மெயிலில் விசாரித்தேன்.
சிங்கப்பூர் சித்தப்பாவிடம்
செல்லில் பேசினேன்.
மலேசியா தம்பி
மெஸேஜ் அனுப்பினான்.
உலகம் சுருங்கிவிட்டது
உறவுகளும் தான்...

அவள்

நான் பிறந்த பின்பே
என் உலகம் பிறந்தது
அவள் என்னைவிட இளையவள்.

ஒரு கேள்வி

எப்படி கொடுக்காமல் விட்டார்கள்?
இலக்கியத்திற்கான நோபல் பரிசை
அவள் பெற்றோருக்கு...

வறுமை

எங்கள் மக்களின்
அசையா சொத்து
வறுமை...

நாத்திகம்

எல்லா மதத்தலைவர்களும்
நாத்திகர்கள்தான் மழலையாய்
இருக்கும்போது...