மௌனத்திற்கு அர்த்தம்

என்
அம்மாவுக்கு பிடித்தது
மௌனம்

மௌனத்திற்கு
பிடித்தது
என் அம்மா

அப்பா
எது சொன்னாலும்
மௌனமே அம்மாவின்
பதில்

அந்த
மௌனத்திற்கு அர்த்தம்
'சரி' என்பதே

அப்பா
வசவுகளை எய்தாலும்
அம்மா மௌனத்தையே
ஏவுவாள்

அப்பாவின்
கத்தல்கள் ஓய்ந்ததும்
மௌனம் அவளுடன் சேர்த்து
வீட்டையும் சுழ்ந்துகொள்ளும்

இந்த
மௌனம் என் பாட்டியிடம்
இருந்து வந்ததாக அறிகிறேன்

இந்த மௌனத்தை
தன் மகளான
எனக்கும் பரிசளிக்க
நினைத்திருக்கிறாள்

நானும்
மௌனத்தை
ஏற்றுக் கொள்வேன்

மௌனத்திற்கு அர்த்தம்
"நீ சொல்வது எதுவும் கேட்கவில்லை"
என்பதாகவும் இருக்கலாம்.

மழை...

இரவெல்லாம்
பெய்த மழையை
நான் இரசிக்காமல்
தூங்கியதை
காலையில்
கண்ணீருடன் உரைத்தன
என் ஜன்னல் கம்பிகள்.....

அன்றில் பறவைகள்

அன்றில் பறவைகளில்
ஆண் இறந்தால்
பெண்ணும் இறந்து விடுமாம்
காற்று இல்லையெனில்
இரண்டும் இறந்துவிடும்
ஆண் பறவை நான்
பெண் பறவை நீ
காற்று நம் காதல் ..

பேசும் பெண்கள்

“பெண்களை
ஆண்கள் பேசவிடுவதில்லை“
என்ற மனைவியை
புறநகர் பேருந்து நிலையத்திற்கு
அழைத்துச் சென்றேன்
“உங்கள் உடைமைகளை பத்திரமாக வைத்துக்கொள்ளவும்“
ஒரு பெண்ணின் குரல் ஒலித்துக்கொண்டிருந்தது.
இரயில் நிலையம் சென்றோம்
“பொதிகை எக்ஸ்பிரஸ் முதல்நடைமேடையை வந்தடையும்“
பெண்குரல் சொன்னது.
விமான நிலையம் சென்றோம்
“ப்ளைட் டு பாம்பே இஸ் ரெடி டு டேக் ஆஃப்“
இங்கேயும் பெண்குரல் தான்.
மனைவியை பார்த்தேன்
சலனமற்று சொன்னால்
“பெண்களை பேசவிடுகிறீர்கள்
ஆனால் பதிவு செய்யப்பட்டதை மட்டும்“