மது அல்லது நிலவு அல்லது பால்யம்

மது
அருந்துகையில் தெரிந்தது
அம்மா காட்டி
சோறூட்டிய -என்
பால்யத்தின் நிலா.

எவ்வளவு முயன்றும்
எடுக்கமுடியவில்லை
எனது மதுவில்
தெரியும் நிலவை.

குட்டியைத் தூக்கும்
தாய் பூனையாய்
நிலவைப் புண்படுத்தாமல்
மதுவை மட்டும்
குடிக்க விழைகிறேன்.

மதுவுடன் சேர்ந்து
நிலவும் வயிற்றுக்குள்
போய்விடுகிறது.
அப்படியே
நிலவுக்குள் இருக்கும் பாட்டியும்
அவள் சுடும் வடையும்.


மீண்டும் மதுவை ஊற்றுகையில்
என் காலிக் கோப்பையை
நிலவும் சேர்ந்தே நிறைக்கிறது.
அப்படியே
நிலவுக்குள் இருக்கும் பாட்டியும்
அவள் சுடும் வடையும்.